«Адалдық пен әділдік» – адамгершілік құндылықтарды қалыптастыруға бағытталған онлайн-конференция

15 қаңтар 2026 жылы мектебімізде оқушылардың бойында адамгершілік құндылықтарды қалыптастыру, жауапкершілік пен азаматтық сананы дамыту мақсатында «Адалдық пен әділдік» тақырыбында онлайн-конференция өткізілді. Аталған іс-шараға 1–11 сынып оқушылары белсенді түрде қатысты.

Онлайн-конференцияның негізгі мақсаты – өскелең ұрпақтың бойына адалдық, әділдік, шыншылдық сияқты жалпыадамзаттық құндылықтарды сіңіру, оқушыларды әділ шешім қабылдауға, өз іс-әрекетіне жауапкершілікпен қарауға тәрбиелеу болды.

Іс-шара барысында адалдық пен әділдіктің адам өміріндегі маңызы, білім беру үдерісіндегі және күнделікті өмірдегі адал мінез-құлық қағидалары жан-жақты талқыланды. Оқушылар өз ойларын еркін білдіріп, өмірден алынған нақты мысалдар келтіре отырып, пікір алмасуға белсенді қатысты. Онлайн-кездесу ашық диалог форматында өтіп, қатысушылардың ойлау қабілетін дамытуға және азаматтық ұстанымын қалыптастыруға ықпал етті.

Талқылау барысында оқушылар адал болудың жеке тұлға ретінде қалыптасудағы рөліне, әділдіктің қоғамдағы тұрақтылық пен сенімді нығайтудағы маңызына ерекше тоқталды. Сонымен қатар, сыбайлас жемқорлыққа қарсы мәдениетті қалыптастыру, әділетсіздікке төзбеушілік таныту мәселелері де назардан тыс қалмады.

Іс-шара соңында оқушылар адалдық пен әділдік – қоғамдағы сенім мен татулықтың, бірлік пен тұрақтылықтың негізгі тірегі екендігі жөнінде ортақ қорытынды жасады. Мұндай тәрбиелік мәні зор іс-шаралар оқушылардың рухани-адамгершілік дамуына оң әсер етіп, олардың саналы азамат болып қалыптасуына ықпал етеді.