КБП жоспарына сәйкес өткізілген ата -аналар жиналысы

Консультациялық пункттің жұмыс жоспарына сәйкес «Смешарики» тобында «Әлемдік кафе» форматында ата-аналар жиналысы өтті. Бұл ерекше формат сенімді атмосфера құрып, ата-аналардың еркін әңгімелесуіне, тәжірибе алмасуына және бала тілінің дамуына қатысты маңызды мәселелерді бірге талқылауына мүмкіндік берді. Ата-аналар шағын топтарға бөлініп, әртүрлі тақырыптық станциялар бойынша қозғалып, мамандардың ұсыныстарын тыңдап, өз ойларымен бөлісті. Жиналыс барысында үш негізгі тақырып қарастырылды. Бірінші тақырып – «Балалардың нашар сөйлеуінің себептері». Ата-аналар үйдегі жеткіліксіз қарым-қатынас, гаджеттерді шамадан тыс пайдалану, сөздік қордың аздығы, есту немесе артикуляция мәселелері сияқты медициналық және тұрмыстық факторлардың баланың сөйлеуіне әсерін талқылады. Әр топ өз қорытындыларын постерге түсіріп, ортаға салды. Көптеген ата-аналар бұл мәселені жаңа қырынан көріп, кейбір үй әдеттерін өзгерту қажет екенін түсінді. Екінші тақырып – «Сөйлеуді табысты дамыту факторлары». Бұл бөлімде ата-аналар баланың тілін дамытуға көмектесетін тиімді жолдарды қарастырды. Үнемі сөйлесу, кітап оқу және мазмұнын талқылау, жаңылтпаштар мен тіл дамыту ойындарын қолдану, тыныш әрі жылы эмоционалды орта қалыптастыру, экран алдында өткізілетін уақытты шектеу, артикуляциялық жаттығуларды күнделікті орындау сияқты ұсыныстар жасалды. Жиналыс соңында ата-аналарға үйде қолдануға арналған «Сөйлеу табысының 10 ережесі» атты жадынама берілді. Үшінші тақырып – «Ойын арқылы үйрету». Бұл станцияда ата-аналар өздерін бала рөлінде сезініп, сөздік қорды дамытуға арналған ойындарды, тіл мен ерінге арналған жаттығуларды, жұмбақ шешу, сурет бойынша әңгіме құрастыру, саусақ және тыныс жаттығуларын орындап көрді. Ойын түрлерінің қысқа уақыт алатынына қарамастан, нәтижесі өте тиімді екені дәлелденді. Жалпы жиналыс өте мазмұнды, қызықты және пайдалы өтті. «Әлемдік кафе» форматы ата-аналарға өз пікірлерін ашық айтуға, басқалардың ойларын тыңдауға, тәжірибе алмасуға және мамандардан құнды кеңестер алуға мүмкіндік берді. Ата-аналар мұндай кездесулердің бала сөйлеуін дамытуда үлкен көмек беретінін және үй жағдайында қолдануға ыңғайлы әдістер ұсынатынын атап өтті.