«Мектепалды даярлыққа қадам: баланың дамуының маңызды кезеңі»

2025 жылдың 5-6 мамыры күндері «Айгөлек» мини-орталығында қазақ және орыс топтарында ата-аналар жиналысы өткізілді. Бұл кездесулер педагогтар мен ата-аналар арасындағы ынтымақтастықты нығайтудың маңызды кезеңіне айналды. Басты мақсат – балалардың жан-жақты дамуы мен келесі білім беру сатысына дайын болуын қамтамасыз ету.
Жиналыстың негізгі тақырыбы – балаларды мектепалды сыныпқа көшіру мәселесі болды. Қазақстан Республикасының Заңына сәйкес, 5 жасқа толған барлық балалар мектепалды даярлықтан өтуі тиіс. Педагогтар ата-аналарға бұл кезеңнің маңыздылығын түсіндіріп, мектепалды даярлық баланың мектепке тез бейімделуіне, оқу дағдыларын және өз бетінше әрекет ету қабілетін дамытуға көмектесетінін атап өтті.

Алайда жиналыс барысында барлық ата-аналар баласын 5 жасында мектепалды сыныпқа беруге дайын емес екені белгілі болды. Кейбір балалар жылдың екінші жартысында дүниеге келген, сондықтан ата-аналар олардың психологиялық тұрғыда дайын еместігін айтып, алаңдаушылық білдірді. Мұндай жағдайда педагогтар әр баланың дамуы жеке жүретінін ескеріп, қажетті жағдайларда икемді шешім қабылдауға болатынын, мамандардың пікіріне және ата-ананың қалауына назар аударылатынын жеткізді.

Сондай-ақ жиналыс барысында балалардың даму мониторингі нәтижелері ұсынылды. Тәрбиешілер тілдік, когнитивтік, эмоциялық және физикалық дамуға қатысты деректермен бөлісіп, әр баланың жетістіктерін жеке-жеке атап өтті. Ата-аналар қызығушылықпен тыңдап, өз баласының даму деңгейін түсінуге мүмкіндік алды. Сонымен қатар, баланың қабілетін арттыруға көмектесетін қосымша кеңестер берілді.
Отбасы мен білім беру мекемесі арасындағы серіктестіктің маңызы ерекше атап өтілді. Баланың жан-жақты дамуы үшін ата-ананың балабақша өміріне белсенді қатысуы, үнемі байланыста болуы және үйде де қолайлы орта қалыптастыруы маңызды екені айтылды.
Жиналыстар сенімділік пен түсіністік жағдайында өтті. Ата-аналар белсенді түрде сұрақ қойып, пікірлерін ортаға салды. Педагогтар болса, өз тараптарынан қолдау көрсетіп, кеңес беруге дайын екенін білдірді.