Білім жетістіктерін мониторингілеу – сапалы білімге сенімді қадам

2025 жылғы 25 сәуірде КММ «Тасты-Талды ауылының жалпы орта білім беретін мектебінде» білім саласындағы маңызды іс-шара — Білім алушылардың білім жетістіктерін мониторингілеу (ББЖМ) өткізілді. Бұл шараға біздің мектеппен қатар ауданымыздағы тағы екі мектеп қатысты. Мониторингтің негізгі мақсаты — оқушылардың оқу материалын меңгеру деңгейін анықтау және білім сапасын арттыру бағыттарын айқындау.

Үш ай бойы мектепте қарқынды дайындық жүргізілді. Мұғалімдер негізгі пәндер бойынша қосымша сабақтар, кеңестер, сынақ тесттерін ұйымдастырып, оқушылардың білімін тереңдетуге бар күшін салды. Сонымен қатар, мектеп психологтары да ауқымды жұмыс жүргізді: олар оқушылармен және ата-аналармен кездесулер өткізіп, тестілеуге дұрыс көңіл-күймен келуге, күйзелісті жеңуге, өз күшіне сенімділік қалыптастыруға көмектесті.

Тестілеу барлық талаптарға сай, арнайы дайындалған екі аудиторияда, облыстық үйлестірушілердің бақылауымен өтті. Мониторингке 4 және 9-сынып оқушылары қатысты. Сынақ барысы салмақты әрі жағымды атмосферада өтті, бұл оқушылардың білімдерін шынайы көрсетуге жағдай жасады.

ББЖМ нәтижелері үш ай ішінде белгілі болады. Бұл мәліметтер оқу үдерісін жетілдіру және оқыту сапасын арттыру үшін маңызды құрал болмақ.

Біз мектебіміздің осындай маңызды шараға қатысқанына қуаныштымыз және осы жолда еңбек еткен мұғалімдерге, оқушыларға, ата-аналарға алғыс білдіреміз. Мұндай іс-шаралар білім сапасын жақсартуға бағытталған бірлескен жұмыстың маңызды бөлігі болып табылады.